Zuatada (ugfähr 50 Krautkrapfa):
6 Oier
600g Mähl
2 Pfund Sauergraud
Butter oder Schmalz
Brotasoß

Krautkrapfa macha:
Mit de Oier und dem Mähl an feschda Doig kneta.

Sauerkraut (am Beschda a Oiga gmachtes) ausdrugga und in ra Pfanna mit Budder oder Schmalz adünsta. Denn abkiahla lassa, sonsch verbrensch dr nochher d `Finger.

Solag des Kraut abkiahlad, aus dem Doig a Rolla forma und Scheiba rabschneida. Dia Scheiba in Mähl daucha ond mit ra Nudlamaschena hauchdünne Stroifa macha. Dia Stroifa zom Droggna am beschda iber en Stuahl henga. 

S`Kraut auf dia Doigstroifa lega und aufwiggla und denn den Doig abschneida. Wenn dia Stroifa z`broit sind, oimol in dr Mitte durchschneida.

Dia Krapfa in dr gleicha Pfanna, wo ma des Kraut adinschdaf hod, mit Butter oder Schmalz goldbraun auf boide Seita abrota. 

Zum Schluß dia Krapfa em ma Topf mit ra dinna Brotasoß solag kocha, bis dr Doig bissfescht isch.

Für Leid mit ma Gebiss gera au länger Kocha, bis die Krapfa schee woich sind.

An guada Abbedidd!!!